• الرئيسية
  • اﻷقسام
  • تقييمات
  • مقالات
  • أدوات و إرشادات
  • أخبار
  • عن ريفيوزات
  • السياسات
  • سوني إكسبيريا بى

    المميزات: شاشة 4 بوصة، كاميرا 8 ميجا بيكسل، ذاكرة داخلية 16 جيجا، مخرج HDMI، ده غير إنه بيدعم نظام فلاش 11.

    العيوب: نظام التشغيل اندرويد قديم، مافيش إمكانية اضافة كارت ذاكرة إضافي، زرار التقاط الصور مش عملي ومش سهل استعماله، بطاريته ضعيفة، الشاشة مش بتكون واضحة في الإضاءة العالية. 

    الخلاصة: إكسبيريا بي تليفون قوى لو ناوى تستحمل مشكلة البطارية وضعف وضوح الشاشة فى النور العالى. مخرج الـ HDMI إضافة مهمة جدًا و مميزة.

    تقييم السونى إكسبيريا بى

    image

    الشكل و التصميم 

    تصميم التليفون يميل إلي الخطوط المستقيمة، و في  شريط شفاف في آخر التليفون من تحت وده بيدى شكل مميز للتليفون. حجمه متوسط وده بيخليه سهل الاستخدام، بالذات لو بإيد واحدة. أبعاد التليفون هى 10.6  x59 x128 ملم، ووزنه 120 جرام. شاشة التليفون 4 بوصة لكن جودتها أقل شوية من المتوقع، وسوني زودت التليفون بزجاج مضاد للخدش عشان يحمى الشاشة . مفيش زراير فى التليفون فى الواجهة الأمامية لكن فى زرار للكاميرا و زرار للتحكم فى الصوت على الناحية اليمين.

     image

     الإمكانيات 

    التليفون عليه نظام تشغيل اندرويد 2.3، وده يعتبر نظام تشغيل قديم،  لكن الخبر الكويس إنك ممكن تعمله تحديث وده هيفرق كثير قي أداء التليفون واستخدام التطبيقات. بس فى كل الأحوال، التليفون بيدعم تطبيقات كثير مهمة جدًا هتخليك تنظم يومك وأعمالك، ده غير إن علي برضه ألعاب كثير، وده بيخلي التليفون أداؤه ممتاز. الحاجة الجديدة اللى سوني عملتها هي إنها خلت فيسبوك مدعوم بالكامل من الجهاز، و ده بيسهل مشاركة الصور والفيديوهات مع اصحابك، ده غير إن هيجيلك قائمة بالمناسبات تلقائياً علي الشاشة. الإكسبيريا بي فيه معالج كويس ثناءي النواة بسرعة 1 جيجاهرتز، ومش بيعاني من مشاكل على صعيد استخدام التطبيقات أو تصفح الجهاز.

    image

    الشاشة و الكاميرا

    الكاميرا جودتها عالية 8 ميجابيكسل، خصوصاً إن شركة سوني معروفة بخبرتها فى مجال الكاميرات. ده غير إن نظام التشغيل بيتيح لك مجموعة من اخيارات بتخليك تحسن من جودة الصورة أثناء التصوير. فى كاميرا أمامية بدقة VGA عشان المكالمات المرئية، ودى جودتها مش عالية لكنها بتؤدي الغرض. الشاشة رغم إنها واضحة وإضائتها قوية، إلا إنها فى الإضاءة المحيطة العالية مابتبقاش واضحة كويس وتباين الألوان بيقل جدًا. بطارية التليفون ضعيفة و بتفقد الطاقة بسرعة، بالذات لو شغلت ألعاب أو تطبيقات. من أهم خواص إكسبيريا بي هو مخرج الـ micro HDMI  اللى بيتيح عرض الصور و الفيديوهات على التليفزيون بجودة عالية جدًا.

    الأداء

    إكسبيريا بي كويس فى تشغيل التطبيقات والألعاب، بس طبعا البطارية بتفقد طاقتها بسرعة مع الاستخدام، وممكن تضطر تشحنها أكثر من مرة في اليوم. للأسف وضوح الشاشة كان بيقل كثير فى ظروف الإضاءة المحيطة العالية. الكاميرا إدتنا صور بجودة و نقاء عاليين جدًا. من المميزات برضه إن متصفح الإنترنت بيدعم نظام فلاش، و ده بيخلى فيه مساحة أكبر لتصفح العديد من المواقع اللى بتعتمد على فلاش.

    الخلاصة

    إكسبيريا بي تليفون قوى لو ناوى تستحمل مشكلة البطارية وضعف وضوح الشاشة فى النور العالى. مخرج الـ HDMI إضافة مهمة جدًا و مميزة.

    ريفيوزات متعلقة